శక్తి

రాజమౌళి, వివి వినాయక్, సురేందర్, పైడిపల్లి వంశీ, బోయపాటి శీను -వీళ్లెవరూ 'శక్తి' సినిమా దర్శ కులు కాదు. కాని అన్నపూర్ణ స్టూడియోలోని మొదటి అంతస్తులో జరుగుతున్న శక్తి షూటింగ్‌కు తరచూ వెళ్లేవాళ్లు. షూటింగ్ గురించి అడిగి తెలుసుకునే వాళ్లు. కారణం -అక్కడి కాళికాదేవి ఆలయం సెట్. అష్టాదశ శక్తి పీఠాలకు కేంద్రమైన కాళికాదేవి ఆలయం సెట్‌ను కళా దర్శకుడు ఆనంద్‌సాయి అక్కడ నిర్మించారు. శక్తి అనే సోషియో ఫాంటసీ సినిమాలో కాళికాదేవి ఆలయంతోపాటు ఇంకా ... ఈజిప్ట్ రాజభవనాలు, ఆభరణాలు, గుహలు, జైపూర్ వీధులు, హంసల సొగసులు కనిపించొచ్చు కానీ, ఆనంద్ సాయి సృష్టించిన ఈ కళాఖండాలేవీ ఫాంటసీ కాదు...
ఆ సెట్‌కు రెండు కోట్ల రూపాయల ఖర్చు
- కళా దర్శకుడు ఆనంద్ సాయి
జగదేక వీరుడు -అతిలోకసుందరి, అశ్వమేధం, గోవిందా గోవిందా సినిమాలకు మా నాన్న చలం కళాదర్శకత్వం వహించారు. అలా వైౖజయంతీ మూవీస్‌తో మా కుటుంబానికి మొదట్నించి సాన్నిహిత్యం ఉంది. నేను ఆర్ట్ డైరెక్షన్‌లోకి వచ్చాక ఎప్పటికైనా అలాంటి సినిమాలకు ఆర్ట్‌డైరెక్షన్‌లో పని చేయాలని లోలోపల అనిపిస్తూ ఉండేది. శక్తి సినిమా కథ విన్నాక నా కల నెరవేరుతుందనుకున్నా. కథ విన్నాక అష్టాదశ శక్తి పీఠాలకు కేంద్రమైన కాళికాదేవి ఆలయమే ఈ సినిమాలో కీలకం అని అర్థమయ్యింది. కాళికాదేవి ఆలయం అనగానే ఎవరికైనా పాతాళభైరవి సినిమా గుర్తొస్తుంది. అది కలకాలం నిలిచిపోÄేయిన సెట్. అలా ఎప్పటికీ చెప్పుకునే సెట్ వేయాలని అనుకున్నాను. నేను వేసిన స్కెచ్ దర్శకుడు మెహర్ రమేష్, నిర్మాత అశ్వనీదత్‌లకు నచ్చింది. కాని చివరి నిమిషం వరకు సెట్ ఎక్కడ వేయాలా అన్న విషయం తేలలేదు.

*** అశ్వనీదత్, మెహర్ రమేష్, నేను ముగ్గురం కూర్చున్నాం. రామోజీ ఫిలింసిటీలో అయితే స్థలం ఎక్కువ ఉంటుంది కాబట్టి అక్కడే బాగుంటుందని దర్శక నిర్మాతల అభిప్రాయం. నేను అంత స్థలం అక్కర్లేదని చెప్పాను. అన్నపూర్ణ స్టూడియోలోని మొదటి అంతస్తు గురించి వివరించాను. ఒప్పుకున్నారు. ఇంతకు ముందే అక్కడ చాలామంది ఆర్ట్ డైరెక్టర్లు స్వర్గం, యమలోకం, కొన్ని దేవాలయాల సెట్స్ వేసి మెప్పించి ఉన్నారు.

అవన్నీ ప్రేక్షకుల మెదడులో ఫిక్స్ అయిపోయున్నాయి. అందువలన వాటిని మార్చాల్సిన అవసరం లేదు. అంతేకాదు వాటిని చెడగొట్టారని కూడా అనిపించుకోనక్కర్లేదు. ఇంకా బాగా చేస్తే చాలు. కాళికాలయం సెట్ విషయంలో అదే నా లక్ష్యం. వేకువ జాము మూడు గంటల నుంచి ఐదు గంటల వరకు సెట్ స్కెచ్ ప్రిపరేషన్. సెట్‌కు అంతా సిద్ధం. అన్నపూర్ణ స్టూడియోలోని మొదటి అంతస్తు ఎంపికయ్యింది. అయితే గుడిలోపల 35 అడుగుల కాళికా విగ్రహం పెట్టాలి. సాధారణంగా అందరూ సెట్ లోపలే వీటన్నిటినీ తయారు చేస్తారు. కాని నా ఆలోచన మాత్రం వేరేగా ఉంది.

*** అష్టాదశ శక్తి పీఠాలను ప్రతిబింబించే పద్దెనిమిది స్తంభాలు, వాటి మధ్యన కాళికాదేవి విగ్రహం చేయాలి. ఏ విగ్రహం లోనైనా కాళికాదేవి నాలుక బయటకు ఉంటుంది. ముఖం రౌద్రంగా ఉంటుంది. అయితే నేను తయారు చేసిన విగ్రహం ప్రసన్నవదనంతో ఉండేలా చూసుకున్నాను. దానికోసం చాలా షేడ్స్ తయారు చేశాను. పద్దెనిమిది స్తంభాలు అష్టాదశ శక్తుల్ని ప్రతిబింబించేలా ఉంటాయి. వాటిపై ఆయా శక్తి స్వరూపాల బొమ్మలు చెక్కాను. క్లైమాక్స్‌లో అవసరార్థం అవన్నీ ఒకవైపుకి పడిపోవాలి.

మళ్లీ తిరిగి యథాస్థానానికి వచ్చేయాలి. అందుకోసం రోప్‌వేసి స్తంభాలను కట్టాను. స్తంభాల తయారీకి ఫైబర్ ఉపయోగించాను. అంతేకాకుండా వాటిని హీరో తాకినపుడు వాటి నుంచి మెరుపులు రావాలి. అవి సీజీ(కంప్యూటర్ గ్రాఫిక్స్)లో కాకుండా సెట్‌లోనే వచ్చేట్టుగా ఏర్పాటు చేశాను. వీటన్నిటినీ బయట రూపొందించి నాకు సంతృప్తి కలిగాకే సెట్ లోపల అమర్చాము. అయితే ఫ్లాష్‌బ్యాక్‌లో వచ్చే ఫైట్‌కోసం ఇదే సెట్ స్థలంలో మరొక సెట్ వేయాల్సి వచ్చింది.

*** కాళికాదేవి విగ్రహం దర్శించుకోవడానికి ముందు శివలింగం ఒకటి ఉండాలి. ఇది ఫ్లాష్‌బ్యాక్‌లో అవసరమవుతుంది. అందుకని ముందు శివలింగం సెట్ వేసి తరువాత అదే స్థలంలో కాళికాదేవి విగ్రహం సెట్ నిర్మించాలనుకున్నాను. అనుకున్నట్టుగానే ముందు శివలింగం ప్లాన్ చేసుకున్నాను. ఆ తరువాత కాళికాదేవి విగ్రహం. దీని నిర్మాణం పూర్తయ్యింది కాని నా పని మాత్రం పూర్తి కాలేదు. ఎందుకంటే నేననుకున్నట్టుగా విగ్రహం వచ్చిందో లేదో చూడటానికి సెట్‌ను ఎన్నో వందల సార్లు ఫోటోలు తీశాను. ఒక్కో నిర్మాణం చుట్టూ రకరకాల యాంగిల్స్‌లో ఫోటోలు వచ్చాయి. అవన్నీ ముందేసుకుని కూర్చునేవాణ్ణి. అంతా ఓకే అయ్యాకే యూనిట్ సభ్యులు లోపల షూటింగ్ మొదలు పెట్టారు.

విగ్రహం ముందు ఒక నీటి గుంట ఉంటుంది. సెట్‌లోపల రాళ్లు పగుళ్ల నుంచి వాటర్ లీకేజీ అవుతుంది. అదంతా గుడి బయట చూపించే జలపాతానికి కొనసాగింపుగా ఉండాలని సెట్‌లో పగుళ్లు వచ్చేలా చేశాను. వాటి నుంచి నీరు ఉబికి రావడం చూసే ఎవరికైనా ఒక మంచి అనుభూతి కలుగుతుంది. షూటింగ్‌కు ముందు సెట్ చూసిన మెహర్ రమేష్ నన్ను అమాంతం కౌగిలించుకున్నారు. సీజీలో కూడా ఇంత అద్భుతంగా చూపించలేమన్నారు. కాళికాదేవి ఆలయం సెట్ పూర్తయ్యాక ఈజిప్ట్ రాజభవనాల కోసం చలో పద్మాలయా స్టూడియో.

*** ఈజిప్ట్, కాశ్మీర్, హరిద్వార్, జైపూర్, రాజస్థాన్ ఎడారి - శక్తి సినిమాలో ఇవన్నీ ఉంటాయి. మెహర్ 'శక్తి' కథ నాతో చెప్పినపుడు ఇదంతా వినడానికి బాగున్నా వీటిని చూపించడానికి, ఆ లొకేషన్స్‌లో షూటింగ్ చేయడానికి చాలా కాలం పడుతుందని, ఖర్చెక్కువవుతుందని అన్నాను. అశ్వనీదత్ చేయగలమన్నారు. అందులో ఈజిప్ట్ బ్యాక్ గ్రౌండ్ సినిమాకు అతికినట్టు సరిపోవాలన్నారు. అందువలన ఈజిప్ట్ పిరమిడ్లు చూడటంతోపాటు, అక్కడి ఇంటీరియర్‌ను నేను స్కెచ్ గీసుకుని వచ్చాను. ఈజిప్ట్‌లో మూడు రోజులు ఇదే పని. ఈజిప్ట్ పిరమిడ్లు ఉండే చోట అవుట్‌డోర్ షూటింగ్ చేసుకోవచ్చనిపించింది.

మెహర్, నేను దానికే డిసైడ్ అయ్యాము. పిరమిడ ్ల నుంచి కోట లోపలికి వెళ్లే సీను మాత్రం సెట్ వేసుకుంటే మంచిదనిపించింది. ఈజిప్ట్ రాణి కోటను పద్మాలయా స్టూడియోలో నిర్మించాను. ఈజిప్ట్ రాజభవనాలకు ఉండే నగిషీలు, ఆర్భాటాలు, మమ్మీల రూపాలు ఇవన్నీ సృష్టించడానికి కష్టపడాల్సి వచ్చింది. ఇవన్నీ చేసినా సరే ఇంత భారీ సెట్‌లో హీరో కనిపించడు అనే ఊహే నన్ను ఇబ్బంది పెట్టింది. అదే మాట మెహర్ రమేష్‌తో అన్నాను. కథా పరంగా తప్పదు అని చెప్పిన రమేష్ దుబాయ్ లొకేషన్స్‌లో మాత్రం నా మాట నెరవేర్చాడు.

*** అండర్‌వరల్డ్ డాన్ జానీ(జాకీష్రాఫ్) దుబాయ్‌లో స్థావరం ఏర్పరుచుకుంటాడు. ఆ పాత్ర సినిమాను ఇంటర్‌లింక్ చేస్తుంటుంది. ఇప్పటి వరకు దుబాయ్‌లో చాలా సినిమాలు తీశారు. మంచి లొకేషన్స్ అన్నీ ఇప్పటికీ చాలా సినిమాల్లో చూపించారు. అయినా శక్తి సినిమాలో డాన్ ఉండే ప్రదేశాలు నూతనంగా కనిపించాలి. ఆయన హైఫై లైఫ్‌ను ఎస్టాబ్లిష్ చేయాలి. అందుకోసం లొకేషన్స్ చూడటానికి నేనూ, మెహర్ వెళ్లాము. ఇక్కడ రెండు ఆలోచనలు -ఒకటి అక్కడి లొకేషన్స్ ఎంచుకోవడం, రెండు అవసరమైతే అక్కడి ఇంటీరియర్‌ను ఇక్కడ సెట్ వేయడం. అయితే రెండోది అవసరం రాలేదు. లొకేషన్స్ చూస్తున్నపుడు మెహర్‌ను అడిగాను -'హీరో ఇక్కడ కనిపిస్తాడా?' అని.

మెహర్ రమేష్ నవ్వుతూ 'అవును' అన్నాడు. ఎందుకంటే అంత ఖరీదైన లొకేషన్స్‌లో షూటింగ్‌కు అనుమతి రావడం అసాధ్యం. అది కేవలం అశ్వనీదత్ వల్లనే సాధ్యమయ్యింది. ఇంతా చేస్తే అక్కడ హీరో లేకపోతే ఎలా అనుకున్నాను. దుబాయ్ నుంచి 60 కిలోమీటర్ల దూరంలో ఉంటుంది ఆ లొకేషన్. దానిని ఎఫ్ -1 ట్రాక్ అంటారు. ఇంతవరకు ఎవరూ షూటింగ్ జరపని స్థలమది. దానిని ఎంచుకోవడానికి నాలుగు రోజులు పట్టింది. ఈ లొకేషన్ కోసం తిరుగుతున్నపుడే ' ప్రేమ దేశపు యువరాణి' పాట మెహర్ రమేష్ లాప్‌ట్యాప్‌లో వినిపించారు. పాట విన్నాక, దానిపై అతని ఆలోచన తెలిశాక మాయాబజార్ రోజులకు వెళ్లిపోయాను.

*** మాయాబజార్‌లో 'లాహిరి లాహరి లాహిరి', 'చూపులు కలిసిన శుభవేళ' పాటల్లో కనిపించే ప్రకృతి మనల్ని పరవశింప జేస్తుంది. అలాంటి ఫాంటసీనే 'ప్రేమ దేశపు యువరాణి' పాటలో చూపించాల నుకున్నాను. ఈ పాటలోని సంగీతం కూడా దానికి అనుగుణంగానే ఉంటుంది. లిరిక్స్ కూడా ట్యూన్‌కు సపోర్టునిచ్చాయి. అందుకని పాటను పూర్తిగా సెట్‌లోనే తీయాలని నిర్ణయించుకున్నాము. హంసలు కదలడం, సన్నగా సెలయేరు, బ్యాక్ గ్రౌండ్‌లో మేఘాలు కదలడం వీటన్నిటినీ స్కెచ్ వేసుకున్నట్టే తయారు చేశాను. షూటింగ్ అంతా లోపలే కాబట్టి ఈ పాట విషయంలో సమస్యలేమీ ఎదురవ్వలేదనే చెప్పాలి.

కాని హైదరాబాద్ శివారులో జరిపిన ఫైట్ షూటింగ్ మాత్రం అనుకున్నంత సులభం కాలేదు. అక్కడ బోలెడంత ఖాళీ ప్రదేశం. పైగా హెలికాప్టర్ నుంచి కింద జరుగుతున్న ఫైట్‌ను షూట్ చేయాలి. సినిమాను ఈ ఫైట్ మలుపు తిప్పుతుంది. అయితే అంత పెద్ద స్థలంలో ఎన్ని బడ్డీలు, హోటల్స్, ఇళ్లు, ఇతర స్థలాలు నిర్మించినా ఇంకా ఖాళీ కనబడుతూనే ఉంది. అందుకని గ్యాప్ లో ఒక్కో బడ్డీ, ఇంటి సెట్ వేసుకుంటూ వెళ్లాను. ఇక జైపూర్‌లో జరిగే ఓపెనింగ్ ఫైట్ మాత్రం అక్కడ మొదలెట్టి హైదరాబాద్‌లో పూర్తి చేయాల్సి వచ్చింది.

*** 'తానియా...తానియా' - ఇది సినిమాలో మొదటి పాట. జైపూర్‌లో ఈ పాట చేయాలి. అనుకున్నట్టుగానే పాట పూర్తయింది. ఆ పాటకు ముందు ఉండే ఫైట్ మాత్రం అక్కడ షూట్ చేయలేకపోయాము. అప్పటికే వాళ్లిచ్చిన గడువు పూర్తయింది. దాంతో ఆ ఫైట్‌ను అక్కడ మొదలు పెట్టి మిగతా అంతా హైదరాబాద్‌లో పూర్తి చేయాల్సి వచ్చింది. అందుకని జైపూర్ సెట్ ఇక్కడే వేసి ఫైట్ తీశాము.

ఈ ఫైట్‌కు ఫైటర్లు ఉంటే సరిపోతుంది కాని, హరిద్వార్‌లో తీసిన కుంభమేళా సీన్‌కు మాత్రం అలా కుదరదు. హరిద్వార్ లొకేషన్ చూడటానికి వెళ్లిన వారిలో నేనూ ఉన్నాను. ఆ కుంభ మేళాలో దాదాపు కోటికి పైగా జనం పాల్గొంటారు. అంతమంది మధ్య షూటింగ్ నడపడమంటే చిన్న విషయం కాదు. కాని దాన్ని చాలా రిచ్‌గా షూట్ చేశారు. సినిమాలో చాలా తక్కువ మంది యాక్టర్లు, జూనియర్ యాక్టర్లు పాల్గొన్న సీన్ ఇదే.

ఇంటర్వ్యూ: బల్లెడ నారాయణ మూర్తి
టేక్ -10
*లడఖ్‌లో తీసిన ఆఖరి పాటలో చెట్టు ఉండాలి. సెట్‌లో ఒక చెట్టును ఏర్పాటు చేయడానికి లక్షరూపాయలు ఖర్చు పెట్టి వేరే దగ్గరి నుంచి చెట్టు తెప్పించాం.

*కాళికా దేవి ఆలయం సెట్‌కోసం రెండు కోట్ల రూపాయలు ఖర్చు అయ్యింది. మూడు నెలల పాటు 200 మంది నిర్విరామంగా పనిచేశారు.

* కాళికాదేవి ఆలయం సెట్ పూర్తి చేసిన మరుసటి రోజు అక్కడికి వెళ్లి చూస్తే దాదాపు 20 మంది అర్చకులు అక్కడ హోమం చేస్తూ కనిపించారు. అశ్వినీదత్ హోమం చేయించారని తరువాత తెలిసింది.

* శక్తి సినిమా సెట్స్ వేస్తున్న సమయంలోనే ఎన్టీఆర్ నుంచి ఒక ఆఫర్ వచ్చింది. మే ఐదున జరగబోయే ఆయన వివాహానికి భారీ సెట్ వేయమని.

* ఈజిప్ట్ రాణి నివాస ముండే రాజభవనం సెట్‌కోసం 40 లక్షల రూపాయలు ఖర్చయ్యింది.

*ఈజిప్ట్ సైనికులు ఉపయోగించే కాస్ట్యూమ్స్, మారణాయుధాలు...ఇవన్నీ ఇక్కడే డిజైన్ చేసి, తయారు చేసి ఫ్లైట్‌లో దుబాయ్ పంపించాము.

* శక్తి సినిమా పూర్త్తయ్యాక 35 అడుగుల కాళికా దేవి విగ్రహాన్ని ఒక దేవాలయానికి అశ్వనీదత్ ఇచ్చేశారు.

* ప్రేమ దేశపు యువరాణి పాటలో బోట్లు వాడాము.

* కాళికాదేవి ఆలయం సెట్ చూడటానికి అక్కినేని నాగేశ్వరరావు వచ్చినపుడు కొద్దిసేపు ఉద్వేగానికి గురయ్యాను. బాగుందని ఆయన అభినందించాక స్థిమిత పడ్డాను.

* కాళికాదేవి ఆలయం, ఈజిప్ట్ రాజమందిరం తొలగిస్తున్నాం అని చెప్పినపుడు చాలా బాధ కలిగింది. అందుకే వాటిని తీసేసేటపుడు అక్కడికి వెళ్లలేదు.

నవ్య, ఆంధ్రజ్యోతి నుండి..