తీన్‌మార్

ప్రేమించిన అమ్మాయికి తన ప్రేమను తెలపడానికి ఏళ్లు గడిచే రోజులు పోయాయి. ఇప్పుడన్నీ నిమిషాల్లో జరిగిపోవాలి. కలవడమైనా...విడిపోవడమైనా. మనసులో పుట్టింది ప్రేమా లేక ఆకర్షణా..తెలుసుకునేలోపే జరగాల్సినవన్నీ జరిగిపోతున్నాయి. ముప్పై ఏళ్ల క్రితం ప్రేమ ఎంత స్వచ్ఛంగా ఉండేదో, ఇప్పుడంత అయోమయంగా మారింది. డేటింగ్, బ్రేకప్‌లతో సాగే మోడ్రన్ ప్రేమికులకి నిజమైన ప్రేమ విలువను తెరమీద చూపించడం కోసం 'తీన్‌మార్' తీసామంటున్నారు నిర్మాత గణేశ్. ఈ సినిమాలో పవన్ కళ్యాణ్ మొదటిసారి ద్విపాత్రాభినయం చేసి క్లాస్‌ని, మాస్‌ని మెప్పించే ప్రయత్నం చేశాడు. మెప్పించినట్టే ఉన్నాడు. ఇది హిందీ రీమేక్ సినిమా అయినా దీని వెనక కూడా బోలెడు సంగతులున్నాయి. అవే ఈ రోజు మేకింగ్ ఆఫ్ ద మూవీ.
పదేళ్లక్రితం ప్లాన్ చేస్తే... - జయంత్ సి. పరాన్జీ, డైరెక్టర్
పవన్‌కళ్యాణ్‌తో సినిమా తీయాలని ఎప్పట్నించో అనుకుంటున్నాను. 1997లో ఒక మంచి స్క్రిప్టు పట్టుకుని కళ్యాణ్ దగ్గరికి వెళ్లాను. ఆయనకి కథ నచ్చింది. కాని ఇంతలో చిరంజీవి నన్ను పిలిచి సినిమా చేయాలన్నారు. కళ్యాణ్‌తో ప్లాన్ చేస్తున్నానని చెబితే వినలేదు. అప్పుడు కళ్యాణే వచ్చి 'మనం తర్వాత చేద్దాం...ముందు అన్నయ్య సినిమా గురించి ఆలోచించండి' అని అన్నాడు. ఆ సమయంలోనే నేను చిరంజీవితో 'బావగారు బాగున్నారా' తీసాను. అప్పటి కోరిక ఇప్పుడు తీరింది. 'లవ్ఆజ్‌కల్' రిమేక్ కావాలని కళ్యాణ్ అడగ్గానే గుడ్ చాయిస్ అనుకున్నాను. కాని మక్కికి మక్కి దింపితే గొడవలైపోతాయన్నాను. అబ్బే...ఏం కాదన్నాడు. 'నీకేంటి నాయనా...నీకు ఇంటి ముందు సెక్యూరిటీ ఉంటారు. నాకలా కాదు. మా హీరోని ఇలా చూపించావేమిటని నీ ఫ్యాన్స్ అందరూ నా ఇంటిమీదకొస్తారు' అని అన్నాను. సైఫలీఖాన్ పెద్ద క్రేజ్ ఉన్న హీరో కాదు. ఎలా చూపించినా అక్కడి ప్రేక్షకులు రిసీవ్ చేసుకుంటారు. కాని కళ్యాణ్‌ని అలా చూపిస్తే ఒప్పుకోరు. దాంతో కథకి కొన్ని కొత్త రంగులద్దాం. లవ్ఆజ్‌కల్‌లో రిషీకపూర్ చేసిన పాత్ర కూడా కళ్యాణ్‌తో చేయిస్తే ప్రేక్షకులకి కావలసిన మాస్ ఎలిమెంట్స్ చూపించే అవకాశముంటుందని అనుకున్నాను. డబుల్ యాక్షన్‌కి కళ్యాణ్ ఓకే చెప్పారు.

డబుల్‌యాక్షన్‌లో కళ్యాణ్...
మొదటిసారి డబుల్‌యాక్షన్ చేస్తున్నాడు. రెండు పాత్రల్ని భిన్నంగా చూపించాలి. స్క్రీన్‌ప్లే, మాటలు బాగుంటేనే నా ప్రయోగం సక్సెస్ అవుతుంది. కళ్యాణ్ ఫోన్ చేసి త్రివిక్రమ్ శ్రీనివాస్ అయితేనే మన కథకి బలం వస్తుందని చెప్పాడు. శ్రీనివాస్ పేరు వినగానే నాకు ఉత్సాహం రెట్టింపయింది. నెల రోజుల తర్వాత శ్రీనివాస్ స్క్రిప్టు పట్టుకుని వచ్చాడు. డైలాగులు చదివి వినిపిస్తున్నాడు...మధ్యలో హీరోయిన్ చెప్పే డైలాగు దగ్గర నా చెయ్యి శ్రీను భుజాన్ని తట్టింది. 'అందంగా లేదని అమ్మని, కోపంగా ఉన్నాడని నాన్నని వదులుకోలేం కదా...అలాగే వాడ్ని కూడా వదులుకోను' అన్న డైలాగ్ నాకు బాగా నచ్చింది. ప్రేక్షకుడి నాడి దొరికితే సరిపోదు...సన్నివేశం వారి మనసుని కదిలించాలి. ఆ పని శ్రీను చేయగలడు. సినిమాలో ఎక్కువగా విదేశీయులు కనిపిస్తారు. పాటలు, కొన్ని సరదా సన్నివేశాలు, ఫైటింగ్ సన్నివేశాల్లో చాలామంది విదేశీయులు కావాలి.

వారిని టీనువర్మ అనే అతను ఎంపిక చేశాడు. నటించడంలో వారు ప్రొఫెషనల్స్ కాబట్టి నేను పెద్ద ఇబ్బంది పడలేదు. న్యూయార్క్‌లో చేయాల్సిన ఫైటింగ్ సీన్‌కి ఫైట్ మాస్టర్ మనవాడే. సరిగ్గా చేయగలడో లేదోనని టెన్షన్ పడ్డాం. కాని బాగానే వచ్చింది. హీరో తర్వాత అందరి కళ్లు వెతికేది హీరోయిన్స్‌ని. మైఖేల్ పాత్రకు జోడి(మీరా)గా మొదట దీపికా పడుకునే అయితే బాగుంటుందని అనుకున్నాం. కుదరకపోవడంతో త్రిషని ఎంచుకున్నాం. చక్కని రూపం, ప్రతిభ గల నటనతో త్రిష అందరినీ మెప్పించగలదని నమ్మాం. అర్జున్‌పాల్వాయి పాత్రకు జోడి(వసుమతి)గా నటించాల్సిన అమ్మాయి కోసం నేను ముంబయిలో ఇరవైరోజులు తిరిగాను. ఎవ్వరూ నచ్చలేదు. హైదరాబాద్‌లో ఒక సినిమా వేడుకలో కృతి కర్బందాని చూశాను. వెంటనే కళ్యాణ్‌కి ఫోన్ చేసి 'వసుమతి దొరికింది' అని చెప్పాను. ఇక అన్నింటికన్నా ముఖ్యమైనది మ్యూజిక్. దాదాపు నా సినిమాలన్నింటికీ మణిశర్మే మ్యూజిక్ ఇస్తాడు. దీనికి కూడా ఆయనతోనే చేయించాలనుకున్నాను.

చాలా భయపడ్డాను...
మామూలుగా అయితే తెలుగు సినిమాలో హీరోయిన్‌ని హీరో కాకుండా ఇంకెవరైనా పెళ్లి చేసుకోవాలనుకుంటే సరిగ్గా పెళ్లి పందిట్లో మూడుముళ్లు వేసేముందు హీరో వచ్చి పెళ్లి ఆపేస్తాడు. ఈ సినిమా కథలో కూడా అలాంటి సందర్భం ఒకటి ఉంది. ఎప్పటిలాగే చేస్తే రొటీన్ అవుతుంది. ఏం చేయాలి? ధైర్యం చేసి హిందీలోలాగే హిీరోయిన్‌కి పెళ్లి చేసేశాం. తరువాత ఆ అమ్మాయి అతనితో విడాకులు తీసుకుని, హీరో దగ్గరికి వెళుతుంది. ఇది మన సంప్రదాయానికి విరుద్ధమే అయినా ప్రేమని రక్షించుకోవడం కోసం ఇలాంటి పనులు చేయడం తప్పు కాదని సినిమా కథ చెబుతుంది. దానికి తగ్గట్టే ఈ సన్నివేశాన్ని చిత్రీకరించాం. ఈ సన్నివేశాన్ని ప్రేక్షకులు ఎలా రిసీవ్ చేసుకుంటారో...ఏమోనని నేను చాలా భయపడ్డాను.

తీన్‌మార్‌లా ఉండాలని... - గణేశ్, నిర్మాత
నిర్మాతగా నా మొదటి సినిమా ఆంజనేయులు. తర్వాత సినిమా ఇదే. పవన్ కళ్యాణ్‌తో సినిమా తీయాలని 2009 నుంచి ప్లాన్ చేస్తున్నాను. ఇప్పటికి కుదిరింది. యాక్షన్ సినిమా, రొమాంటిక్ సినిమా, కామెడీ సినిమా..ఏదైతే కళ్యాణ్‌కి సూటవుతుంది? ప్రస్తుతం ప్రేక్షకులు కళ్యాణ్ నుంచి ఏది కోరుకుంటున్నారు? అనే అంశాలపై చాలా వర్క్ చేశాను. రెండేళ్ల నుంచి కళ్యాణ్‌కి నాలుగు కథలు చెప్పాను. ఏవీ నచ్చలేదు. చివరికి ఇది చేద్దామని ఆయనే లవ్ఆజ్‌కల్ సినిమా పేరు చెప్పారు. పూర్తిస్థాయి ప్రేమకథా చిత్రం. నాక్కూడా బాగా నచ్చింది. ఇందులో నేను కోరుకున్న మూడు అంశాలు ఉన్నాయి. పూర్తిస్థాయి ప్రేమికుడి పాత్రలో కళ్యాణ్‌ని చూడాలని ప్రేక్షకులు కూడా ఎప్పటినుంచో ఎదురు చూస్తున్నారు.

ఈ సినిమాకి డైరెక్టరు ఎవరయితే బాగుంటుంది? అని అనుకుంటుంటే..ప్రేమించుకుందాం..రా, ప్రేమంటే ఇదేరా వంటి సూపర్ హిట్ సినిమాలందించిన జయంత్ గుర్తుకొచ్చారు. కళ్యాణ్ కూడా ఆయనైతేనే బాగుంటుందని అన్నారు. ఇక నటీనటుల గురించి చెప్పాలంటే...హీరోయిన్ సెలక్షన్ అంతా డైరెక్టర్, హీరోలే చూసుకున్నారు. మిగతా నటుల విషయానికొస్తే...అన్ని తెలుగు సినిమాల్లో విలన్‌లుగా కనిపించే పరేష్ రావెల్, సోనూసూద్‌ని ఇందులో మంచివారిగా చూపించాలనుకున్నాం. ప్రేక్షకులు ఎలా రిసీవ్ చేసుకుంటారోనని కొంత ఆలోచించినా.. కొత్తగా ఉండాలంటే ఇలాంటి ప్రయోగం చేయడం తప్పదని వారినే ఎంచుకున్నాం. షూటింగ్ సమయంలో సోనూ...తన పాత్రని ఇంత పాజిటివ్‌గా చూపించడం పట్ల చాలా హ్యాపీ ఫీలయ్యేవాడు. కళ్యాణ్ గర్ల్‌ఫ్రెండ్‌గా నటించిన హాలీవుడ్ నటి మిస్చెల్ సినిమాకి స్పెషల్ ఎట్రాక్షన్. త్రివిక్రమ్ శ్రీనివాస్‌తో స్క్రీన్‌ప్లే, మాటలు రాయించుకుని షూటింగ్ మొదలుపెట్టాం.

96 రోజుల్లో...
మొదట ముప్పైఏళ్ల కిత్రం ప్రేమికుడు అర్జున్‌పాల్వాయి పాత్రకి సంబంధించిన కొన్ని సన్నివేశాలు వారణాసిలో చిత్రీకరించాం. సినిమా షూటింగ్ నిమిత్తం మూడు దేశాలు వెళ్లాం. అమెరికా, దక్షిణాఫ్రికా, బ్యాంకాక్. స్వదేశంలో అయితే కాశీ, మైసూర్, అహ్లాబాద్, హైదరాబాద్‌లలో షూటింగ్ చేశాం. ఎట్టి పరిస్థితుల్లోనూ 100 రోజుల్లో షూటింగ్ పూర్తయిపోవాలని అనుకున్నాం. 96 రోజుల్లో సినిమా రెడీ అయిపోయింది. సినిమాకి ఏం పేరు పెట్టాలి? అనే విషయంపై చాలా వర్క్ చేశాం. కథకు దగ్గరగా పెట్టాలా? ప్రేక్షకుడికి దగ్గరగా పెట్టాలా? ఈ రెండు అంశాల గురించి ఆలోచిస్తే...కళ్యాణ్‌కి ప్రేక్షకులే ముఖ్యమనిపించారు. తీన్‌మార్ అయితే మాస్ అభిమానుల్ని బాగా ఆకట్టుకుంటుందని అదే ఖాయం చేశాం. పాటలు ఎవరితో రాయించాలనుకుంటున్న సమయంలో జయంత్‌గారు, మణిశర్మగారు భాస్కరభట్లని సెలక్ట్ చేసుకున్నారు.

ఆయన రాసిన ఓహో...బస్తీ దొరసాని, అలె..అలె బాగా హిట్ అయ్యాయి. మిగిలిన పాటలు రహమన్ అనే కొత్తబ్బాయి, విశ్వ రాశారు. అవి కూడా చాలా బాగున్నాయి. ఇక బడ్జెట్ విషయానికొస్తే కథ డిమాండ్‌ని బట్టి నేను ముందుకు వెళ్లాను. వారణాసిలో చిత్రీకరించిన దేవుడి పాటకు హైదరాబాద్ గచ్చిబౌలిలోని ఒక అల్యూమినియం ఫ్యాక్టరీలో సెట్టింగ్ వేశాం. కొన్ని సన్నివేశాలు వారణాసిలో తీసినా చాలావరకూ సెట్టింగ్‌లోనే తీయాల్సివచ్చింది. ఈ ఒక్క పాటకు కోటి రూపాయలు ఖర్చు అయింది. అలాగే అర్జున్‌పాల్వాయి పాత్ర చుట్టూ ఉన్న సన్నివేశాల్ని కూడా చాలావరకు సెట్టింగ్‌లతోనే నడిపించాం.

స్టెప్పులదిరాయి... - రాజు సుందరం, కొరియోగ్రాఫర్
ఈ మధ్యకాలంలో నేను చేసిన సినిమాల్లో కొత్తగా అనిపించింది తీన్‌మార్. ఈ సినిమాలో మూడు పాటలకు నేను కొరియోగ్రఫీ చేశాను. మిగతా వాటికి మరో కొరియోగ్రాఫర్ కళ్యాణ్ చేశాడు. డుబా..డుబా, అలె..అలె, ఓహో బస్తీదొరసాని పాటలు చాలా బాగున్నాయి. నేను అనుకున్నట్టుగానే చేయగలిగాను. హీరో చాలా సపోర్టివ్ పర్సన్. అలాగే నిర్మాత గణేష్ కూడా. వయసులో చిన్నవాడైనా సినిమా నిర్మాణంలో ఎక్కడా రాజీపడలేదు. కాకపోతే రకరకాల ప్రదేశాల్లో షూటింగ్ ఉండడం వల్ల వీసాల విషయంలో కొంత ఇబ్బంది పడ్డాం. డుబా...డుబా అనే సాంగ్ అంతా బ్యాంకాక్‌లో చిత్రీకరించాం.

అందులో అందరూ విదేశీ వనితలే కనిపిస్తారు. ఎలా చిత్రీకరిస్తే బాగుంటుందనే విషయంపై చాలా జాగ్రత్తగా ప్లాన్ చేశాను. ఎందుకంటే అది సినిమా ఓపెనింగ్ సాంగ్. పాతికమంది అమ్మాయిల మధ్యన పవన్ హావభావాలు చాలా చక్కగా వచ్చాయి. ఒకటికి రెండు సార్లు చూసుకుని మరీ చేసేవాడు. అలె...అలె..సాంగ్ చిత్రీకరణ అంతా హైదరాబాద్‌లోనే జరిగింది. ఆ పాటలో హీరో, హీరోయిన్స్ ఇద్దరూ రకరకాల ఫీలింగ్స్‌తో కనిపించాలి. ప్రాక్టీసు చేసి మరీ చేశారు. మొత్తానికి తీన్‌మార్ కొరియోగ్రఫీ నాకు చాలా సంతోషానిచ్చింది. నిర్మాతగా గణేశ్‌కి మంచి భవిష్యత్తు ఉందని భావిస్తున్నాను.
-భువనేశ్వరి

నవ్య, ఆంధ్రజ్యోతి నుండి..