1940: యువత తపన -దేశానికి స్వాతంత్య్రం1970: యూత్ కోరిక -ఒక ప్రభుత్వ ఉద్యోగం
2000: కుర్రకారు కల -కార్పొరేట్ కంపెనీలో ఐటీ ప్రొఫెషనల్
2011: డూడ్స్ లక్ష్యం -కెరీర్ను తమకు నచ్చినట్టు మలచుకోవడంలో నో కాంప్రమైజ్
యువత ఆలోచ నలు మారడానికి మొదట్లో ముప్పై సంవత్సరాలు పడితే, ఆ తరువాత వారి దృక్పథ ం కొత్త దారులు తొక్కడానికి పది సంవత్సరాలే సరిపోయాయి. అనుకున్న పనిని పర్ఫెక్ట్గా సాధించాలంటే మాత్రం సర్దుకుపోతే కుదరదని నేటి తరం భావిస్తోంది. కెరీర్లోనూ, జీవితంలోనూ ఎంత వరకు సర్దుకుపోవాలో చెప్పే ఫిలాసఫీయే మా మిస్టర్ పర్ఫెక్ట్ సినిమా అని దర్శకుడు దశరథ్, నిర్మాత దిల్రాజులు అంటున్నారు. ఆ ఫిలాసఫీని ఎలా సెల్యులాయిడ్ మీదికి తెచ్చారో చదవండి...
సినిమా సోల్ ఫిలాసఫీ:
"కెరీర్లో ఏదైనా సాధించాలంటే సర్దుకుపోకూడదు. సర్దుకుపోతే ఓడిపోతాం. కుటుంబ సంబంధాలను నిలబెట్టుకోవడానికి మా త్రం సర్దుకుపోవాలి. సర్దుకుపోవడం వల్ల ఇప్పుడు ఓడిపోవచ్చు. కానీ ఓడిపోయి ఆత్మీయతల్ని గెలుస్తాం.''
2008 సంవత్సరం ఏప్రిల్ నెల మధ్యలో ఈ డైలాగు పుట్టింది. మా మిస్టర్ పర్ఫెక్ట్ సినిమాలో హీరో విక్కీ(ప్రభాస్) క్లైమాక్స్లో చెప్పే డైలాగు ఇది. సినిమా అంతా అయిపోయాక సీట్ల నుంచి లేస్తుండగా హీరో వాయిస్ ఓవర్లో వస్తుంది. సినిమా చివర్లో వినిపించే ఈ మాట నుంచే అసలు సినిమా అంతా పుట్టింది. దాని వయసు మూడు సంవత్సరాలన్నమాట. దీని చుట్టూ ఒక కథ అనుకుని ప్రభాస్కు వినిపించాం. అతనికి ఉన్న మాస్ ఇమేజ్ను దృష్టిలో పెట్టుకుని కుటుంబ ప్రేక్షకులను థియేటర్కు రప్పించేలా మలచిన లైన్ ఇది. ప్రభాస్కు నచ్చింది. ఇంకా డెవలప్ చేయమన్నారు.
రచనా సహకారానికి సోలమ్, ప్రవీణ్ వర్మ, బాబీ, కిషోర్, రిషిలను ఎంచుకున్నాం. సినిమాను ఓపెన్ చేసే సీన్ చిన్న పిల్లల క్రికెట్ సీన్ అనుకోకుండా తట్టింది. ఓ రోజు రిషి వచ్చి ఓ పుస్తకంలో ప్రింట్ అయిన కథ చూపించారు. అది చదివాము. బాగుంది. దాన్నే సినిమా ఆరంభానికి ఉపయోగించుకోవచ్చుగా అనిపించింది. ఏదైనా సాధించాలంటే కాంప్రమైజ్ కాకూడదని హీరో అనుకుంటాడు. కెరీర్లో అది ఓకె కానీ మానవ సంబంధాల్లో అది కుదరదు. క్షమించడం నేర్చుకోకపోతే జీవితంలో నీ కంటూ ఎవరూ మిగలరు...అనే సూక్తి ఒకటి ఉంది. దాన్నే మేం సర్దుకుపోకపోతే అని మార్చుకుని కథ రెడీ చేశాం.
ఇచ్చే ఫిలాసఫీ:
"మనం ఏది ఇస్తే అదే మనకు వస్తుంది.''
విక్కీ తనకు నచ్చ లేదని ప్రియ(కాజల్) తండ్రి(మురళీ మోహన్)తో చెబితే, దానికి స్పందించి ఆయన పై డైలాగు చెబుతాడు. హీరో ఆస్ట్రేలియా నుంచి వస్తాడు. వీళ్లది పల్లెటూరు. నగరంతో పోలిస్తే పల్లెటూరిలో సర్దుకుపోయేతత్వం ఎక్కువ. అయితే ఈ సీన్లో మనుషులు మాత్రమే సర్దుకుపోయేలా ఉంటే సరిపోదు. వారి దృక్పథాలను ప్రతిబింబించే పరిసరాలు కూడా వారి మనసుల్లాగే గొప్పగా ఉండాలి.
అలాంటి పల్లెటూరి కోసం చాలా కష్టపడాల్సి వచ్చింది. మన రాష్ట్రంలో అలాంటి ఊళ్లు చాలానే ఉన్నాయి. కాని అక్కడ ప్రభాస్, కాజల్, ఇతర తారలను చూడటానికి అభిమానులు ఎగబడవచ్చు. అందుకని వేరే ఊరు చూడాలనుకున్నాము. అలా తమిళనాడులోని పోలాచిని ఎంపిక చేసుకున్నాం. అక్కడే ఎక్కువ భాగం షూట్ చేశాం. విక్కీ, ప్రియల మధ్య సీన్స్ కోసం మాత్రం 'రోజా' సినిమాలో కనిపించే 'టెంకాసీ' అనే ప్రదేశంలో షూట్ చేశాం. ఈ ప్రదేశాలన్నీ సినిమాకు కలిసొచ్చాయి. ఇదే పల్లెటూరి సీన్స్లో గుడి దగ్గర ఫైట్ ఉంటుంది.
ఆ ఫైట్ను పీటర్ హెయిన్స్ ప్రత్యేకంగా డిజైన్ చేశారు. హీరోను కొట్టడానికి ఎవడైతే మనుషుల్ని తీసుకొస్తాడో, ఆ మనుషులే వాణ్ణి కొడతారు. దానికి తగ్గట్టుగా ఉంటుంది ఆ ఫైట్. అంతేకాకుండా ఈ సన్నివేశంలో హీరోయిన్కు గాయం కూడా అవ్వాలి. అయితే పోలాచి, టెంకాసీ ఈ రెండు చోట్లా ఫైట్ సీక్వెన్స్ మేమనుకున్నంత బాగా రాలేదు. దాంతో ఆ ఫైట్ను అహోబిలంలో తీశాము. 'మనం ఏది ఇస్తే అదే మనకు వస్తుందన్న' మాట చుట్టూ ఉండే సీన్స్ బాగా రావడానికి మేం ఎంచుకున్న పల్లెటూరి లొకేషన్స్ బాగా సహకరించాయి.
తీసుకునే ఫిలాసఫీ:"ఏడిస్తే సమస్య పరిష్కారం అవుతుందంటే జీవితాంతం ఏడవగలను. అలా కానపుడు ఏడ్వడంలో అర్థం లేదు కదా!''
విక్కీ తనను ఓదార్చబోయేటపుడు ప్రియ చెప్పే డైలాగు ఇది. ఒక అందమైన అమ్మాయి తనను వద్దన్న అబ్బాయినే కోరుకోవాలంటే ఆ అబ్బాయి ఎలా ఉండాలి? మనిషి మంచితనం సంగతి అలా ఉంచితే, అతని రూపం, ఛరిష్మా ఆమెతో పోటీ పడాలి. అవసరమైతే ఆమెను మించిపోవాలి. ఇలా ఉండాలంటే ప్రభాస్ను చాలా హ్యాండ్సమ్గా చూపించాలి. ముందుగా మా అందరి దృష్టి హెయిర్స్టైల్ మీద పడింది. ఆ పనిని హెయిర్ స్టైలిష్ హకీమ్ అలీకి అప్పగించాం. రెండు మూడు స్కెచ్ల తరువాత హెయిర్స్టైల్ వచ్చేసింది. అతను వేసుకునే దుస్తులకూ అదే పద్ధతి. ప్రభాస్ ఇంతకు ముందు 'డార్లింగ్' సినిమాలో లవర్బాయ్గా కనిపించారు.
ఇందులోని పాత్ర లుక్ దానికి కొనసాగింపుగా ఉండకూడదనుకున్నాము. ఆ బాధ్యతలు డిజైనర్ భాస్కర్ తీసుకున్నారు. ఈ తరం అబ్బాయిలు కొంచెం రఫ్నెస్ కూడా కోరుకుంటారు. కొంచెం స్మార్ట్...కొంచెం రఫ్ కోసం మేకప్మ్యాన్ శ్రీనివాసరావు కష్టపడ్డారు. అందుకే అంత అందమైన అమ్మాయి ప్రేమను హీరో పొందగలిగాడు. ప్రియ పాత్ర కోసం కాజల్ ఎంపిక సులభంగా జరిగింది. పైగా ప్రభాస్, కాజల్ కాంబినేషన్ డార్లింగ్లో వర్కవుట్ అయ్యింది కూడా. మాగీ పాత్రకు ఎవరినైనా కొత్త వారిని తీసుకుందాం అనుకున్నాము. విదేశాల్లో పెరిగిన అమ్మాయి కోసం ప్రయత్నిస్తుండగా తాప్సీ సరిపోతారనిపించింది. ఆమెతో ఆడిషన్స్ చేశాక మాగీ అన్వేషణ ముగిసింది.
ఆస్ట్రేలియాలో షూటింగ్ ఫిలాసఫీ:
"ప్రేమంటే ఒకే బ్రాండ్ కాఫీ ఇద్దరికీ నచ్చడం కాదు. ఇద్దరూ కలిసి ఒకే బ్రాండ్ కాఫీని తయారు చేసుకోవడం.''
కెరీర్, జీవితం... ఏ విషయంలోనైనా పర్ఫెక్ట్గా ఉండాలనుకునే విక్కీ, మాగీ(తాప్సీ)లను ఉద్దేశించి మాగీ తండ్రి(ప్రకాష్రాజ్) చెప్పే డైలాగు ఇది. ఆరున్నర లక్షలమంది ఆలోచనల్లో మా ఇద్దరి ఆలోచనలే ఒక్కలా ఉన్నాయని వీళ్లు అనుకుంటే, దానికి భిన్నంగా మిగతా వారంతా కలిసి వీళ్లిద్దరినీ రిజెక్ట్ చేశారని ప్రకాష్రాజ్ అంటారు. ఈ సీన్లో పల్లెటూరు ఉండదు. నగరమే. చాలాకాలం క్రితం ఇండియా నుంచి వెళ్లి వ్యాపారంలో ఎన్నో సంస్థలు స్థాపించి తల పండిపోయిన పాత తరం(ప్రకాష్రాజ్), చిన్న వయసులోనే పెద్ద డీల్స్ ఎగరేసుకుపోయిన నేటి తరం (ప్రభాస్) మధ్య వార్ అది.
ఈ సీన్ రిచ్గా రావాలని సిడ్నీలో షూట్ చేశాము. టెక్నీషియన్స్తో పాటు దాదాపు నలభై మందిని ఇక్కడి నుంచి తీసుకెళ్లాం. ఆస్ట్రేలియాలో షూటింగ్ చాలా కష్టంతో కూడుకున్న పని. కీలకమైన సన్నివేశాలు, క్లైమాక్స్ అంతా ఆస్ట్రేలియాలో ప్లాన్ చేసుకున్నాం. కానీ అక్కడ మేమనుకున్న దానికంటే రెట్టింపు ఖర్చు, కష్టాలు ఎదురయ్యాయి. ఆస్ట్రేలియాలో షూటింగ్ కంటే యూఎస్లో షూటింగ్ చాలా సులభమని చెప్పవచ్చు. ఇప్పటి వరకు మా ప్రొడక్షన్లో విదేశాల్లో షూటింగ్ జరుపుకొన్న సినిమా మిస్టర్ పర్ఫెక్ట్ ఒక్కటే. మిగతా సినిమాలన్నిటికీ పాటల కోసమే విదేశాలకు వెళ్లడం అలవాటు. కాని మిస్టర్ పర్ఫెక్ట్ సినిమా టాకీ పార్టు కూడా అక్కడ తీయాలని నిర్ణయించుకున్నాము.
అక్కడ కోటిన్నర రూపాయల బడ్జెట్ ప్లాన్ చేసుకుంటే మూడు కోట్ల రూపాయలకు పైగా ఖర్చు అయ్యింది. యూఎస్లో సరిగ్గా ప్లాన్ చేసుకుంటే ఎటువంటి ఇబ్బందులూ ఉండవు. ఇక్కడా ప్లాన్ చేసుకున్నాం. కాని షూటింగ్ స్పాట్కు వెళ్లగానే ఏదో ఒక సమస్య. మీడియేటర్ తప్పు దోవ పట్టించినా సరే కాంబినేషన్, కాల్షీట్లు గుర్తుపెట్టుకుని సర్దుకుపోవాల్సి వచ్చింది. దాంతో ఖర్చు పెరిగింది. యూఎస్లో అయితే ఇలా జరిగుండేది కాదు. అయినా సరే మేమనుకున్న రిచ్ లుక్ రాబట్టుకున్నాం. సీన్ షూట్ చేశాక రఫ్ చూసున్నప్పుడు మాత్రం ఆ కష్టం మరచిపోయే వాళ్లం.
***
హీరో తనకు నచ్చకపోవడంతో హీరోయిన్ తండ్రి అతనిపైకి రౌడీలను పంపించడం వల్ల
జరిగే ఫైట్ ఆస్ట్రేలియాలో తీయాలి. ఇక్కడైతే రౌడీల చేతిలో కర్రలు, కత్తులు
చూస్తాం. అదే ఆస్ట్రేలియాలో అయితే ఏం ఉందా? దీనికి పీటర్ హెయిన్స్ ఒక ఆలోచన
చెప్పారు. ప్లాన్ బాగుంది కాని అది వర్కవుట్ అవుతుందా అవదా అన్న భయం
కలిగింది. ఎందుకంటే పీటర్ హెయిన్స్ ఆ ఫైట్ను 'పార్కోస్'( గోడల మీద
దూకేవాళ్లు)తో ప్లాన్ చేశారు. ప్రపంచం మొత్తం మీద పార్కోస్ ఉన్నదే పదిమంది. అందులో పారిస్లో ఇద్దరు, వియత్నాంలో ముగ్గురు, ఆస్ట్రేలియాలో ఇద్దరు ఉన్నారు. మీడియేటర్ ద్వారా ఈ ఏడుగుర్ని పట్టుకోగలిగాం. ఖర్చు కూడా ఎక్కువయ్యిందనుకోండి. మొత్తానికి వీళ్లు వెంబడిస్తుండగా హీరో పరిగెత్తే సీన్ సినిమాలో వస్తుంది. ఇది చూసి చాలామంది డూప్లతో చేశామని, గ్రాఫిక్ ఉపయోగించామని అనుకున్నారు. సిడ్నీ నగరం మధ్యలో వచ్చే ఫ్లైఓవర్ బ్రిడ్జ్లను గెంతుతూ హీరో పరుగుతీయడం ఒరిజినల్గా చేసినదే.
*** రెండో హీరోయిన్ తాప్సీని పరిచయం చేసే సీన్ కూడా ఆస్ట్రేలియాలోనే ప్లాన్ చేశాం. ఈ సీన్లో ఆమె బైక్ రేస్లో ప్రథమ స్థానం దక్కించుకుంటుంది. సినిమాలో ఈ సీన్ అటూ ఇటూగా ఒక నిమిషం మాత్రమే కనిపిస్తుందేమో. కాని దీనికోసం ఎంతో శ్రమించాం.
ఒక హెలికాప్టర్తోపాటు, నాలుగు కెమెరాలు వాడాల్సి వచ్చింది. దీనికంటే కష్టమైన పనేమిటంటే ఆ సీన్ షూట్ 'సీక్లిఫ్' బ్రిడ్జ్పైన తీయాలనుకున్నాం. అది చాలా అందమైన లొకేషన్. చాలా ఖరీదైనది కూడా. అంతేకాకుండా ఒక పూట మాత్రమే షూట్ చేయాలి. దాని కోసం అనుమతులు తెచ్చుకున్నాక షూటింగ్ ఉదయం మొదలుపెడితే మధ్యాహ్నం వరకు నో బ్రేక్. ఏకధాటిగా షూటింగ్ జరిపాం. అలా రెండు రోజుల్లో షూట్ చేసి సినిమాలో మాత్రం దాన్ని ఒక నిమిషమే చూపించగలిగాం.
కామెడీ ఫిలాసఫీ:
"అందరూ జల్సా కిషోర్లా బతకాలంటే కుదరదు.''
హీరో తనకు నచ్చేది మాత్రమే చేస్తాడు. అతని అభిప్రాయాలకు వ్యతిరేకంగా ఒక పాత్ర ఉండాలి. అది కామెడీ పాత్ర కావాలి. వాళ్లిద్దరి మధ్య కామెడీ పండాలి. దీని కోసం చాలా ఆలోచించాం. చివరకు రచయిత బాబీ ఒక మాట చెప్పారు. హీరో తనకు నచ్చేదే చేస్తాడు... కమెడియన్ మాత్రం తనకు నచ్చింది అందరి మీదా రుద్దుతుంటాడు. ఈ పాత్ర కోసం జల్సా కిషోర్(బ్రహ్మానందం) పుట్టాడు. జల్సాకిషోర్, విక్కీ మధ్య వచ్చే ఎంటర్టైన్మెంట్ సన్నివేశాలన్నీ దాదాపు బాబీయే అందించారు. ఇంటర్వ్యూ: బల్లెడ నారాయణ మూర్తి
టేక్ -5* సినిమా మొత్తం 130 రోజుల్లో పూర్తి చేశాం.
* మొదట అనుకున్న బడ్జెట్ కంటే సినిమా పూర్తయ్యేసరికి 20 శాతం పెరిగింది.
* తాప్సీ తన డబ్బింగ్ తనే చెప్పుకొన్నారు. కాజల్కు మాత్రం వేరే వాళ్లతో చెప్పించాం.
* ఆస్ట్రేలియాలో 18 రోజుల పాటు షూటింగ్ జరిగింది.
* సిీక్లిఫ్ బ్రిడ్జ్పై తీసిన రెండో హీరోయిన్ ఇంట్రడక్షన్ రేస్ సీన్కు 'మాట్రిక్స్', 'మిషన్ ఇంపాజిబుల్ -2' సినిమాలకు పని చేసిన సాంకేతిక నిపుణుడు హీలీ పనిచేశారు.
No comments:
Post a Comment