అహ నా పెళ్లంట

40 మంది పెద్దలు60 రోజుల పెళ్లి

వంద అబద్దాలాడైనా ఒక కల్యాణం జరిపించొచ్చన్నారెవరో. కాని 'మ్యాచ్ ఫిక్సింగ్' పెళ్లి అందులో ఉందో లేదో. దర్శకునిగా తన మొదటి సినిమా ఒక హాస్య వివాహ చిత్రం అవుతుందని వీరభద్రమ్ కూడా అనుకోలేదు.

'అహ నా పెళ్లంట' సినిమాతో తనకు మూడుముళ్లు పడొచ్చనిపించాక ఆయన ఆకాశమంత పందిరి వేయలేదుకానీ 40 మందికి కథ చెప్పి 'బావుంది'అనే ప్రీ మ్యారేజ్ సర్టిఫికెట్ మాత్రం సంపాదించుకున్నారు. అంతేకాదు ఇచ్చిన మాట ప్రకారం 60రోజుల్లో షూటింగ్ తంతు ముగించి వీరభద్రమ్ అంటే 'కామెడీ' కాదు సుమా అనిపించుకున్నారు. థియేటర్‌లో నవ్వుల భజంత్రీల కోసం బిజీ బాలరాజును సృష్టిస్తే సినిమా విడుదలయ్యాక ఈ సినిమా కోసం పనిచేసిన చాలామంది నిజంగానే బిజీ బాలరాజులయ్యారు.
యాక్షన్ నుంచి కామెడీ వచ్చింది...
వీరభద్రమ్, దర్శకుడు రెండేళ్ల క్రితం 'సంఘం' సినిమా షూటింగ్ కోసం అమెరికా వెళ్లాను. ఆ సినిమాకు నేను కో-డైరెక్టర్ని. అక్కడ ఉన్న నిర్మాత అనిల్‌కు నా గురించి తెలిసింది. నన్ను కలవడానికి ఆయన వచ్చారు. కాసేపు మాట్లాడాక తను హైదరాబాద్ వస్తున్నానని, ఏదైనా కథ చెబితే దర్శకునిగా అవకాశం ఇస్తానని అన్నారు. అప్పటికే నా దగ్గర ఒక కథ ఉంది. అల్లు అర్జున్, గోపీచంద్ వంటి యాక్షన్ హీరోలకు సరిపోయే కథ అది. అనిల్‌కు నచ్చింది. ఒప్పుకున్నారు. ఇది అయిపోయాక నేను తిరుగు ప్రయాణమాయ్యాను. కొన్నాళ్ల తరువాత అనిల్ హైదరాబాద్ వచ్చారు. కాని నా కల సాకారమవడానికి మాత్రం సమయమింకా రాలేదు. అయితే అదెంతో దూరంలో లేదని కూడా మనసు చెప్పింది.

*** అమెరికాలో చెప్పిన కథ అనిల్‌కు నచ్చిన మాట వాస్తవమే. కాని నేను కొత్త దర్శకున్ని, ఆయనకు తొలిచిత్రం -ఇక్కడే అనిల్ ఆలోచనలో పడ్డారు. అందుకే హైదరాబాద్‌లో ఆయన్ని కలిసినపుడు నాతో మరొక కథ ఏదైనా తయారు చేయమని అన్నారు. దర్శకత్వమే ఏకైక లక్ష్యమైన నాకు మరో కథ రాసుకోవడం కష్టమైన పనేమీ కాలేదు. ఇలా ఎందుకంటున్నానంటే ఈసారి అనిల్ ముందు ఒకటి కంటే ఎక్కువ కథలే ఉంచగలిగాను కాబట్టి. వాటిల్లో 'అహ నా పెళ్లంట' ఓకే అయ్యింది. నా మనసు కుదుట పడింది -అయితే ఆ తరువాతే నాకు అసలు పరీక్ష మొదలైంది.

*** సరదాగా, ఉల్లాసంగా సాగే ఈ సినిమా కథ మున్ముందు నలభైమందిని మెప్పించాల్సి వుందని నేను ఊహించలేదు. అంతేకాదు దీనికి అల్లరినరేష్‌ను హీరోగా నేను మొదట అనుకోలేదు. అసలు ఆయన మా దృష్టిలో లేనే లేరు. అందుకే ఈ కథను మేమనుకున్న హీరోకు చెప్పాల్సి వచ్చింది. అలా ఈ కథను విన్నవారి సంఖ్య నలభై వరకు చేరింది. తొమ్మిదినెలల వరకు ఇలా వింటూనే ఉన్నారు. విశేషమేమిటంటే బాగులేదని ఒక్కరూ అనలేదు, కాని సినిమా మాత్రం సెట్స్ మీదకు వెళ్లలేదు. ఇలా కాలం గడుస్తుండగా మొదట అనుకున్న హీరో ఈ ప్రాజెక్టు నుంచి తప్పుకున్నారు. అప్పుడు మళ్లీ మా సెర్చ్ మొదలైంది.

*** ఒక రోజు సాయంత్రం నేనూ, రైటర్ గోపీమోహన్ పార్కులో వాకింగ్ చేస్తున్నాం. అప్పుడు గోపీమోహన్‌కు దర్శకుడు శ్రీనువైట్ల నుంచి ఫోన్ వచ్చింది. అతని 'రెడీ' సినిమాకు సితార అవార్డు వచ్చిందని, ఆ ఫంక్షన్‌కు రావాలని ఆయన కోరారు. నేను, గోపీమోహన్ అక్కడకు వెళ్లాము. ఆ ఫంక్షన్‌లో నేను అల్లరి నరేష్‌ను చూశాను. అతనైతే కథకు సరిపోతారనిపించింది. నరేష్ నా గురువు ఇ.వి.వి సత్యనారాయణ కొడుకు. ఇ.వి.వి దగ్గరే నేను అక్షరాలు దిద్దుకున్నాను. కాబట్టి నరేష్ నాకు బాగానే పరిచయం.

మనసులో అనుకున్నానో లేదో నేరుగా వెళ్లి నరేష్‌తో మాట్లాడాను. ఈ ప్రాజెక్టు గురించి చెప్పాను. కథ వినాలని కోరాను. విన్నారు. ఆయనకు నచ్చింది. నా కష్టాలు తీరాయి. షూటింగ్ తేదీ నిర్ణయించాము. క్లాప్ కొట్టడమే మిగిలి వుందనగా నరేష్ దగ్గరి నుంచి ఫోన్ -నాన్న కథ వినాలంటున్నారని.

*** ఇ.వి.వి సత్యనారాయణ దగ్గరకు భయం భయంగా వెళ్లాను. ఏమంటారోనని లోలోపల గుబులు. కథను మార్చమన్నా, బాగోలేదన్నా మరికొద్ది రోజుల్లో మొదలవ్వాల్సిన నా ప్రాజెక్టు ఆగిపోతుంది. ఆయన ఆఫీసులో సిట్టింగ్. డైలాగులతో సహా చెప్పేశాను. మొత్తం విన్నాక ఆయన నుండి కాసేపు నిశ్శబ్దం. 'అయిపోయింది సార్' అన్నాను. ఇ.వి.వి సత్యనారాయణ చిరునవ్వుతో 'చాలా బాగుంది. సూపర్ హిట్ అవుతుంది' అన్నారు. గాల్లో తేలినట్టయ్యింది.

ఆయనకు కృతజ్ఞతలు చెప్పుకుని బయటపడ్డాను. శ్రీహరిని కలిసినపుడు కూడా లోపల పీకుతూ ఉండేది. ఆయన పాత్ర ఎలా ఉంటుందన్న విషయంతోపాటు కథ కూడా చెప్పాను. ఆయన చేస్తానని చెప్పడమే కాకుండా కచ్చితంగా ఈ సినిమా విజయం సాధిస్తుందని అన్నారు. ఒక పనైపోయింది అనుకున్నాను.

హీరోయిన్‌గా ఎవరిని పెడితే బావుంటుందోనని చాలా ఆలోచించాము. మేమనుకున్న వాళ్లు బిజీ. అందుకే కొత్త వాళ్ల కోసం వేట మొదలెట్టాం. నలభై, యాభైమందిని స్క్రీన్ టెస్ట్ చేశాం. చివరకు రితూ బర్మేచాను ఎంపిక చేసుకున్నాం. షూటింగ్ మొదలైంది. స్క్రిప్ట్ రాసుకున్న సమయంలోనే ట్యాగ్‌లైన్‌గా 'మ్యాచ్ ఫిక్సింగ్' అనుకున్నాను. కాని టైౖటిల్ డిసైడ్ చేయలేకపోయాను. అలాంటి సమయంలో డా. డి.రామానాయుడు ఆదుకున్నారు.

*** పెళ్లి నేపథ్యంగా హాస్యంతో నిండిన సినిమా ఇది. కాబట్టి 'అహ నా పెళ్లంట' అని పెడితే బాగుంటుందనుకున్నాము. కాని సమస్యేమిటంటే ఆ టైటిల్ రామానాయుడిది. అందుకే ఆయన్ని కలిసాము. అభ్యంతరం వ్యక్తం చేయకుండా పెట్టుకోమన్నారు. ఈ టైటిల్‌నే ఎందుకు కోరుకున్నామంటే సహజంగా పెళ్లి రెండు రకాలు -ఒకటి పెద్దలు నిశ్చయించేది. రెండోది ప్రేమ పెళ్లి. ఇందులో ఈ రెండూ ఉండవు. ఇదో ఫిక్సింగ్ పెళ్లి.

అందుకే హీరో ఎక్కడికి వెళ్లినా హీరోయిన్ సోదరులు వదిలిపెట్టరు. ఇలాంటి పరిస్థితిలో గోవాలో దాక్కోవాలని వెళ్లిన నరేష్, బ్రహ్మానందం చాపర్‌లో తిరుగు ప్రయాణమవ్వాల్సి వస్తుంది. ఆ ప్రయాణంలో బ్రహ్మానందం భయపడుతుంటే నరేష్ చాపర్ నడపడం, వీరికి భగవాన్ సూచనలివ్వడం - ప్రేక్షకులు బాగా ఎంజాయ్ చేస్తున్న సీన్స్‌లో ఇదొకటి. అయితే నరేష్ నడిపిన చాపర్ నిజమైనది కాదు. దానికోసం చాలా శ్రమపడాల్సి వచ్చింది.

"' ఎప్పుడూ చూసే సీన్స్ కాకుండా కొత్తవి ఉండాలని చాపర్ సీన్ రాసుకున్నాను. కాని దానిని తెరమీద చూపించాలంటే ఒక చాపర్ అవసరం. మరొకటి ఎయిర్ కంట్రోల్ రూమ్. ఏదో చేశామన్నట్టు కాకుండా ఉండాలంటే కచ్చితంగా ప్రేక్షకులు వాస్తవదృశ్యాన్ని అనుభవించాలి. అందులోంచే కామెడీ పుడుతుంది. అందుకోసమే ఖర్చైనా పరవాలేదని చేవెళ్లలో చాపర్, కంట్రోల్ రూమ్ సెట్ వేశాము.

చాపర్ ఆకాశంలో తేలియాడటం, హోర్డింగ్ నుంచి దూసుకుపోవడం, రన్‌వేపై ఆగడం వంటివన్నీ సిజి(కంప్యూటర్ గ్రాఫిక్స్)లో చేసుకున్నాం. నాకు ఎంతో ఇష్టమైన పాట'చినుకులా రాలి'... దీనినే రీమిక్స్ చేయించాను. ఈ పాట బాగా రావడానికోసం బ్యాంకాక్‌లో షూట్ చేశాము. పిక్చరైజేషన్ పరంగా, లిరికల్‌గా ఆ పాట నాకు బాగా నచ్చింది. అన్నిటికంటే ముఖ్యమైనదేమిటంటే ఈ సినిమాను 60 రోజుల్లో పూర్తి చేస్తానని చెప్పాను. షెడ్యూల్ కూడా అలాగే తయారుచేసుకున్నాను. అనుకున్న సమయంలోనే పూర్తి చేయగలగడం నాకు మరింత ఆనందాన్నిచ్చింది.

రీమిక్స్ విషయంలో చర్చ...
రఘు కుంచె, సంగీత దర్శకుడు
సంగీత దర్శకునిగా నాకిది రెండో సినిమా. దర్శకుడు వీరభద్రమ్ చాలా కాలంగా నాకు పరిచయం. బంజారాహిల్స్‌లోని ఒక రెస్టారెంట్‌లో ఆయన నాకు ఈ కథ చెప్పారు. ఎలాంటి సంగీతం కావాలో వివరించారు. సన్నివేశాలనుకనుగుణంగా నేను ట్యూన్స్ సిద్ధం చేసుకున్నాను. టైటిల్స్ పడేటపుడు ఒక పబ్ పాట పెడితే బాగుంటుందని నిర్మాత అనిల్ అన్నారు.

ఇక్కడున్న పబ్బుల్లో ఎప్పుడూ హాలీవుడ్, బాలీవుడ్ పాప్ పాటలే వేస్తుంటారనీ, ఈసారి మన సినిమాలో పాట వేసేట్టు పాటను కంపోజ్ చేయాలన్నారు. డీజేల బేస్‌సౌండ్స్‌తో గిటార్ వంటి పరికరాలు ఉపయోగించి పాటను సిద్ధం చేశాను. అందరికీ నచ్చింది. ఏ సమస్యా లేదు. కాని దర్శకుడు వీరభద్రమ్ తనకిష్టమైన పాటంటూ చెప్పిన పాటతోనే పెద్ద చిక్కొచ్చిపడింది.

*** 'చినుకులా రాలి...వరదగా మారి...'- దీనిని ఆయన రీమిక్స్ చేయమన్నారు. రెండో సినిమాలోనే రీమిక్స్ ప్రయోగాలు చేస్తే బాగుండదేమో అనిపించింది. మరోవైపు పాట బాగలేకపోతే మంచిపాటను పాడుచేశానని తిట్టుకుంటారు. ఇలాంటి భయాలన్నీ ఉన్నాయి. అందుకే ఆ పాట వద్దని దర్శకుడు వీరభద్రమ్‌తో వాదించాను. ఆయన పట్టువదల్లేదు. చివరకు రీమిక్స్ చేశాను. అయితే నాకు ఆనందం కలిగించే విషయమేమిటంటే ఆ పాటను నేనే పాడటం. అంత మంచి పాటకు నా గొంతుకనివ్వడం మరిచిపోలేని అనుభూతి. ఆ పాటను థియేటర్‌లో చూసి ఊపిరిపీల్చుకున్నాను. ఇక నేను ఎంతో ఇష్టపడ్డ మరో పాటను మాత్రం యూనిట్‌లో మొదట చాలామంది వద్దన్నారు.

*** హీరో, ఇద్దరు హీరోయిన్ల మధ్య సన్నివేశం. మెయిన్ హీరోయిన్ తన మనసులోని భావాలను హీరోకు చెప్పాలని అనుకుంటుంది. ఆ సందర్భంలో మెలోడి పాట. నెమ్మదిగా మొదలవుతుంది. ట్యూన్ సిద్ధం చేసి వినిపించాను. ఎవరూ ఒప్పుకోవడం లేదు. జనాలు లేచి వెళ్లిపోతారని అన్నారు. అయినా పట్టువదల్లేదు. సాహిత్యం రాయించుకున్నాను. ఎప్పటి నుంచో గాయని చిత్రతో పాడించాలనే కోరిక ఉంది.

ఈ పాటను ఆమెతోనే పాడించాను. పాట పూర్తైయ్యాక చిత్ర మెచ్చుకున్నారు. ఆనందం కలిగింది. అదే ఉత్సాహంతో యూనిట్‌లో అందరికీ వినిపించాను. అందరికీ నచ్చింది. ఆ పాట పిక్చరైజేషన్ కూడా బాగా రావడంతో క్రమంగా అందరూ పాడుకుంటున్నారు. బంపర్ఆఫర్ సినిమాలో 'పెళ్లెందుకే రమణమ్మ' పాట మా నిర్మాత అనిల్‌కు చాలా ఇష్టం.

దానినే ఆయన రీమిక్స్ చేయమన్నారు. నేను ఒక ప్రపోజల్ పెట్టాను. రమణమ్మ పాట పెళ్లి వద్దని చెబుతుంది. మన పాటలో వివాహం, భార్య గొప్పతనం చెబుతాం. కాబట్టి రమణమ్మ పాటలోని ట్యూన్ వినిపించి తరువాత కొత్త ట్యూన్‌లోకి వెళదాం అన్నాను. ఆ పాటకు ఉత్తరాంధ్ర జానపదం ఉపయోగించు కున్నా కాబట్టి, ఈ పాటకు తెలంగాణ తీన్‌మార్‌ను పెట్టుకుందాం అని చెప్పాను. చెప్పినట్టే ట్యూన్ రెడీ చేశాను. రమణమ్మ పాటలాగే ఈ పాట కూడా పాపులర్ అవుతోంది.

బిజీ బాలరాజు కామెడీ పంచ్
* బిల్లంటే కట్టగలం గాని బార్లెక్కడ కడతాం సార్ * ఒరే సుబ్బు... నీ ఓదార్పుయాత్రకు నేనెందుకురా! * మేం చెబితే 'డబ్బా' అంటారు...అదే మీరు చెబితే 'అబ్బా' అంటారు... * ఎందుకో సార్...కొన్ని సార్లు ఎంత తాగినా లోపలి అపరిచితుడు బయటకు రాడు * తతత... అని చేయి అంత బారు చాపింది... కొట్టడానికి కాదు సార్ గుడ్ మార్నింగ్ చెప్పడానికి ఇంటర్వ్యూ: బల్లెడ నారాయణ మూర్తి

నవ్య, ఆంధ్రజ్యోతి నుండి..